Hoxe o alumnado da ESO participou nunha actividade proposta por Vía Láctea Filmes, no Teatro Principal de Tui, onde tivo a oportunidade de coñecer a historia do fotógrafo e cineasta galego, José Gil, da man de Manolo González, autor do libro “Nos días encantados de agosto” (unha biografía de José Gil), e Ignacio Vilar, director de cine e guionista.
Contáronnos que José Gil naceu en 1870 en Rubiós, unha parroquia de As Neves, no seo dunha familia labrega. Comezou a traballar no Balneario de Mondariz, onde se iniciou na fotografía; anos máis tarde, abriría varias galerías de fotografía, primeiro en Ourense e máis tarde en Vigo onde se convertería nun fotógrafo de prestixio. Pouco despois, dedicouse á filmación, converténdose no primeiro produtor cinematográfico galego. Realizou numerosos documentais, o que o levou a crear o cinemóbil, co que percorreu numerosas localidades da provincia de Pontevedra.
Encantounos a experiencia de ver dúas proxeccións mudas (unha de Charlie Chaplin de 1914 e outra de Harold Lloyd de 1921) e de coñecer a figura do “explicador” da man de Ignacio Vilar e de dous compañeiros doutro colexio. A terceira proxección foi do propio José Gil, na que puidemos ver imaxes do porto de Vigo, de Ponteareas, de Nigrán,… coas que viaxamos ao tempo dos nosos bisavós e/ou tataravós. Para rematar esta grata experiencia puidemos visitar a réplica do cinemóbil de José Gil e ver a súa cámara cinematográfica.
Con esta actividade, o alumnado de 4º da ESO xa ten os cimentos para comezar cun proxecto interdisciplinar do que vos falaremos ao longo deste curso… estade atentos.
